豪花公帑買垃圾 廢柴消防要問責

消防處近年豪花公帑入錯貨嘅醜聞鑊鑊新鮮鑊鑊甘，講起真係一匹布咁長，消防車「射水無力」、救護車「癡肥」要瘦身、豪裝指揮車行唔郁、通訊系統頻頻「失聲」，正一無奇不有。

最醜死怪莫過於「陽痿消防車」，當局○八年以七千萬元購入十七架法國製油壓升降台消防車，第一批到埠驗收至發現「水土不服」，因為油溫過熱導致水泵力度不足，射水無力，結果新車啱啱上陣就要退役，得物無所用。最慘就係，因為當局終止合約被供應商入稟索償，消防處買錯消防車仲要倒貼，你話係咪同納稅人開玩笑吖。

受害者仲有前線消防員，新車冇得用，焗住用舊車，冇冷氣熱到飛起唔在講，舊車甩皮甩骨，五勞七傷，成日撻唔着，連上斜都唔夠力，你話點救人呀。遇上塞車仲大鑊，死氣喉廢氣倒噴入車內，救人變害人，簡直匪夷所思。

衰開有條路，火燭車衰完，又輪到指揮車。消防處舊年用七百幾萬元為沙田消防局購入俗稱「變形金剛」嘅新型流動指揮車，由於加裝咗廁所同伸延會議室，車身超重超闊唔出得街。救人救火嘅指揮車居然唔可以喺香港合法行走，消防處「多廁一舉」，係咪搞笑呢。超磅指揮車大而無當，消防庸官大而無腦，認真絕配！

講開又講，入錯貨早已成為消防處嘅「專利」。火燭車、指揮車唔掂，救護車亦上演現代版「削足就履」鬧劇。呢，處方○九年引入兩百架新救護車，首批因為車身太大，過唔到高度限制三米嘅通道，除咗要求供應商將餘下新車改矮，部分救護站仲要改闊大閘遷就，笑話百出。

買車唔掂，買其他設備一樣靠估。嗱，消防處大拿拿使咗近十億元，採用第三代調派系統同數碼化無線通訊系統，企圖截斷傳媒消息來源，點知故障多過食飯，一個成日死機，一個成日跪低，納稅人真係睇到都眼冤。

消防設備裙拉褲甩，烏龍百出，消防官僚唔好好檢討，改善管理，仲咁得閒玩針對滋擾正義傳媒，打壓新聞自由，簡直不知所謂。冤有頭，債有主，咪話太一叮唔提醒消防處處長陳楚鑫吖，浪費公帑，草菅人命呢條數，市民遲早搵你班庸官問責o架，叮！