Sun潮語：獨醒

唔知幾時開始，香港由亞洲國際都會變成悲情城市。以前我哋引以為傲嘅一切都變成明日黃花：由世界良港，變成世上貧富懸殊最嚴重嘅地區之一、由幾近世界最廉潔城市、言論新聞自由度最高嘅地方，到今日貪曾貪湯當道，新聞自由不斷倒退嘅爆裂都市。聽日就係主權移「膠」十六周年，建制派加中央維穩系統無所不用其極，要港人乖乖，不要上街。身為一個喺香港受過高等教育嘅中產中坑，處身如此亂世，真係令人諗起昔日同處亂世、鬱鬱寡歡嘅屈原，佢嘅〈漁父〉寫道：「舉世皆濁我獨清，眾人皆醉我獨醒。」我城落日，身邊嘅老友一個個變得沉默、變得犬儒，最抑鬱最痛苦，莫過於「獨醒」。

Sun潮語：獨醒

雖然，「獨醒」係出自「眾人皆醉我獨醒」，但係意思有啲唔同。「獨醒」係指某啲人嘅言論，淨係自己先會明，又或者係講某人曲高和寡，言論標奇立異、脫離主流。呢個詞常見於網上討論區，但未算廣泛使用，亦未到日常對話層面。不過，近年已開始多人用，假以時日，喺眾人皆醉嘅時候，應該越嚟越多人「獨醒」。

回顧特首上台一年，朝剛敗壞，用人唯親。佢承諾過控制樓市，但樓價不跌反升，又話要攪環保，但係就滿海膠粒油污，仲要擴建堆填區。話要香港和諧，點知又有愛港力加深香港人分化……聽日七一，真係唔敢估計有幾多人會上街，又有幾多人去貪圖小恩小惠。舉世皆濁，「獨醒」不如呼喚香港人「眾醒」！香港人，除咗靠兩手，我哋仲有雙腳，一於以腳步，踏出我哋嘅路，同心上街將屬於我哋嘅香港爭回來！

第一手消息請下載on.cc東方互動iPhone/iPad/Android/Windows Phone Apps