政壇：搞搞政：擴屯門堆填區 建仔內訌
設計圖片
港府擴建三個堆填區計劃餘波未了，民建聯更因屯門堆填區爆內訌。據聞，該黨支持在屯門嘅堆填區計劃，但地區支部就強烈反對，仲會喺後日區議會大會投票反對擴建屯門堆填區動議，擺明摑黨中央一巴，呢着難免令出自新界西嘅建仔主席譚耀宗（譚Sir）尷尬，黨內分歧亦有排難收拾。
設計圖片
消息話，該黨西貢將軍澳支部基於地區壓力增加，加上當時正在英國倫敦嘅立法會議員葛珮帆越洋「發功」，終發表聲明強烈要求押後審議擴建將軍澳堆填區，此舉殺黨中央一個措手不及，最終建仔都要走入反對陣營。其實屯門區嘅反對聲一樣咁大，但譚Sir當聽唔到，屯門支部再三討論後仍然唔同意該區設堆填區計劃。
據聞，有黨員揚言有意退黨表達不滿，有傳呢個黨員就係屯門支部主席、屯門區議會副主席梁健文，我哋曾致電梁健文求證但未獲回覆。雖然「退黨論」疑幻疑真，但屯門支部憤怒了卻係鐵一般事實。
