政壇：田二少再做外父恨抱孫
田北辰夫婦（左一、二）開心愛女田植恩與男友謝惠敏（左三及右三）拉埋天窗，右一及二為男方父母。
立法會議員田北辰（田二少）喜事連連，繼上月三女田植鏘出嫁後，尋日又到大女田植恩（Lauren）下嫁經營社會企業嘅男友謝惠敏（Bobby）。一對新人都係虔誠基督徒，朝早喺中環聖約翰座堂行禮，中午再到金鐘港麗酒店舉行結婚酒會，唔少政商界名人到賀。再做外父嘅田二少風騷到極，致詞時回顧當年金融風暴，差啲令佢公司「一鋪清袋」，Lauren由紐約返港幫佢打理公司，忙到連拍拖都冇時間，當時愛女話「神自有安排」，結果神終於為佢覓得如意郎君，田二少又話，對女婿Bobby好滿意，畀足一百分。
田北辰夫婦（左一、二）開心愛女田植恩與男友謝惠敏（左三及右三）拉埋天窗，右一及二為男方父母。
恨抱孫嘅田二少話自己生咗四個仔女，希望兩個女結婚後起碼生夠八個喎！尋日出席嘉賓有「牛仔褲大王」楊釗、廣東社團總會主席王國強、協成行董事總經理方文雄、利豐集團主席馮國經夫婦、合和實業主席胡應湘夫婦、「蘭桂坊之父」盛智文夫婦、已故「船王」包玉剛三女包陪麗，仲有行政會議召集人林煥光夫婦、前滙豐私人銀行亞洲區行政總裁王以智等。
