政壇：謝偉俊透露下屆或唔選
由九龍東三十多名區議員組成嘅創建力量尋日低調開張，觀塘區議會主席陳振彬（Bunny）任主席，首席顧問則係立法會議員謝偉俊（Paul），並無請官員出席。我哋之前講過，有傳創建力量係一把「雙刃刀」，密切監視阿Paul嘅表現，如果表現唔理想，下屆選舉可能唔再畀票阿Paul，搵人取而代之。阿Paul尋日就首次透露下屆可能唔參選。
當問及呢班議員下屆立法會選舉會否幫手拉票時，阿Paul就話言之尚早，事關距離下屆選舉仲有咁多時間，好多事都講唔埋，仲話自己嘅年紀已經唔細，可能唔選退休喎！有地區人士話，如果阿Paul唔選，頂上嘅人選好可能就係Bunny。創建力量有三十多名區議員，如果結集做立法會選舉樁腳嘅話，贏一席真係唔難。
