政壇：黑英暗插貪曾禍港
設計圖片及對白
回歸十六年前夕，社會瀰漫沖天怨氣，天文台前台長林超英（黑英）尋日就喺一個電台節目為呢個現象把脈，講到香港回歸後嘅變化，黑英直言好擔心，因為貪污喺政府頂層蔓延、腐蝕政府管治，社會上又有貧窮嚴重、教育被塑造成產業嘅現象，社會積累唔少怨氣。搞成咁，黑英不點名批評前任行政長官「貪曾」曾蔭權爵士責無旁貸，直指貪曾表現怠惰、施政傾斜富豪，最大污點之一仲有房屋政策。黑英話，香港已經白白浪費咗十五年，唔可以再咁落去。
設計圖片及對白
多元角力中內耗蹉跎
從天文台退休後，黑英仍然熱心公共事務，除咗瞓身搞環保外，仲力撐平等教育機會，出身公務員嘅佢亦對公僕隊伍嘅士氣低落好關注，尋日佢喺一個電台節目中以寫信嘅形式大談對香港回歸以來嘅觀察，佢話自己同太太出身基層，可以建立較好事業、組織圓滿嘅家庭，係受咗平等教育同香港嘅恩，正因為咁，佢對香港嘅目前同未來發展有擔憂、亦有期許。
黑英認為，香港回歸十多年，貧富懸殊加劇、跨代貧窮成形，基層工時長但工資低，教育更出現「貴價名校無錢莫進來」嘅現象，以致社會流動萎縮，種種現象令人煩躁不安。另一方面，政府頂層又貪污蔓延，管治無力，佢好痛心話，咁樣嘅香港已經唔係佢熟悉嘅香港。而香港喺複雜嘅政治、多元角力嘅內耗中蹉跎，最終只會喺全球跑道上落後。
追溯近年問題根源，黑英不點名話前任行政長官怠惰無為、對富豪傾斜，房屋政策更係最大污點政策之一，因為貪曾停建居屋、少建公屋，更把土地供應權以勾地表方式拱手讓畀地產商，搞到呢幾年香港樓價飆升、大量冇辦法置業嘅市民不堪高租金而要遷入劏房……回歸十五年多，黑英認為香港幾乎係原地踏步，白白浪費時間，佢不禁問：「活在這個樣子的香港，年輕人還會覺得有前途嗎？」
