消防處烏煙瘴氣 不滅火只識點火

呢，最近消防處充當政治打手，惡意針對正義傳媒，勞師動眾上門滋擾東方報業集團。最好笑嘅係，消防處有口話人冇口話自己，針對東方嘅所謂「投訴」查無實據，反而佢哋自己嘅消防總部被揭混亂不堪，原本只招待職員嘅食堂變成大眾飯堂，每逢午膳時間，食堂門庭若市，大量街客自出自入，唔止與民爭利搶走附近食肆生意，而且構成保安漏洞。本報記者現場視察，發現消防總部大樓變咗冇掩雞籠，唔只六樓食堂中門大開，十一樓嘅紀念品中心亦係來者不拒，至於其他樓層咯喎，只要緊隨拍卡職員，亦可直闖心臟地帶，你話係咪離晒大譜吖！

其實，消防總部食堂管理混亂早已成為公開嘅秘密，管理層一直闊佬懶理，對保安漏洞視而不見。最荒唐嘅係，本報上月踢爆問題後，本月中再作跟進查詢，消防處竟然拖足八日先至回應。相對於佢哋聲稱收到一封電郵投訴，短短四日已經踩上東方報業中心，如果話冇政治動機，細路仔都唔信喇。待人嚴，待己寬，知錯不改，擇惡固執，紀律部隊毫無紀律，真係世間罕有！

開講有話，見微知著。當年日本軍官見到滿清北洋水師喺炮管上晾衫，知道中國海軍不堪一擊，家陣香港人見到消防總部變成冇掩雞籠，就知道消防處嘅管理幾咁混亂，旨意佢哋救火救人，蚊都瞓蛇都死喇。前日之嘛，消防處第三代調派系統又失驚無神死機，被迫改用人手收發指令，結果搞到倒瀉籮蟹，最少一宗火警及五宗白車應召遲到。唔怪得前年花園街一場大火就造成死傷枕藉喇，消防靠得住，豬乸會上樹吖！

講開消防亂象，真係三日三夜都講唔完，本報歸納出「消防管理六宗罪」，包括調派混亂延誤救援、消防局無船變真空、縱容員工不斷違規、擦鞋逢迎內地高官、觀察計劃被批腰斬、對待員工極不人道等等。連前處長林振敏都幫理不幫親，批評消防處近年醜聞不斷，公眾形象連環插水。其實計太一叮話齋，消防處何只形象插水，簡直醜態畢露！

消防處亂七八糟，糊塗官不知所謂。處長陳楚鑫唔好側側膊兩頭望嘞，連前上司都睇唔過眼，閣下究竟識唔識個醜字點寫？唔識寫嘅話，太一叮可以教你，消防處嘅職責係滅火救人，唔係充當政治工具，唔好掛住製造白色恐怖，打壓新聞自由，做好自己本分先喇，叮！