Sun潮語:HiHi

依家有人同你講「HiHi」,唔好以為係「Just to say Hi」,其實好可能係鬧緊你。是咁的,潮語「HiHi」係解「仆街」。話說,高登討論區嘅系統管理員推出咗無粗口版嘅公司模式,將討論區上面嘅粗俗字句Filter成其他嘅字,當中「HiHi」就係用嚟取代「仆街」,久而久之,網友就直接用「HiHi」嚟表達「仆街」。除「HiHi」之外,其實仲有好多其他代用詞例如「Hi Auntie」或「向左走向右走」等,如想知更多,可自行上高登查找。

Sun潮語:HiHi

一年容易又七一,香港人又係時候同特衰政府埋單計數。其實上年已經有四十萬人出嚟遊行,未開始做嘢已經用腳步對佢投不信任票。當時很多人說,要給一點時間,可能佢得呢?好啦!一年試用期已過,咁又點呢?舊年新政府上場,即爆麥齊光事件,有官員要即時下台。之後又被踢爆有僭建,再之後反國教事件,十幾萬人圍政總。跟住又有行會成員接連出事,香港兢爭力下跌,張震遠事件……特首同政府民望繼續沉底,當初承諾不斷彈票。今時今日,行會可以離譜到休假唔開會!成個班子唔使一年,已經甩皮甩骨,潰不成軍。喺普通商業機構,呢啲CEO已經畀董事局炒咗九世。主權移交不經不覺已經十六年,香港到底仲要「HiHi」到幾時?

講到「HiHi」,今時今日香港真係「HiHi」!香港人由一個低民望嘅特首繼續揸旗,睇嚟香港都有排「HiHi」,每年七一都唔使慶祝主權移交,係香港主權移「膠」!不過咁……十年前0371,香港人曾經成功爭取踢走老懵董。十年後今日,一於再吹雞,今年七一,香港人一於全家總動員,一齊上街宣示主權!

第一手消息請下載on.cc東方互動iPhone/iPad/Android/Windows Phone Apps