政壇：搞搞政︰助爭居港權貪湯呃人
設計圖片及對白
政府九九年首次提請人大釋法，推翻終審法院首宗居港權案判決，令大批本來可受惠判決嘅港人內地子女喪失居港權。人稱「周伯」嘅周國輝過去十四年站喺爭取港人內地子女居港權最前線，前後十四年從不間斷，見盡政府主責官員升遷同立法會議員更替，究竟邊個係真心幫佢哋，邊個係大隻講，「係人係鬼」一目了然，其中一個為人熟悉嘅名字就係最近爆出貪腐醜聞、豪花公帑買酒兼設宴請客食飯嘅「貪湯」前廉政專員湯顯明。
設計圖片及對白
「害咗三代人」
話說當日周伯同逾千名家長喺舊政府總部示威，最終獲與當年做緊保安局署理常秘嘅貪湯等人會面，期間周伯開宗明義話要爭取居留權子女留低，核實身份後發出身份證，當時貪湯僅簡單話會考慮意見，後來事實證明貪湯都係得個講字呃人喎。
同樣令人氣在心頭嘅有九七回歸後嘅三任特首，周伯首先批評前兩任特首無見過佢哋，之後又爆料本來對現任特首CY梁振英有期望，佢曾兩次去信CY，非但不獲接見連回信都欠奉，所以已無晒期望。佢批評三任特首愛理不理嘅態度「害咗三代人」，而立會政黨亦只係以利益行先。周伯希望今屆政府任期完結前，能夠徹底解決數萬個港人內地子女來港個案。
講番周伯嘅落實子女居港權家長會，早前有人將呢個組織同爭取子女居港權家長會混淆，但其實兩個係唔同嘅組織。據聞最近周伯仲開始寫回憶錄，至今寫咗五十多頁，等佢完成大作後，邊個係人、邊個係鬼，相信會更加清楚。
