政壇：林鄭黃錦星冇啖好食
設計圖片及對白
社會對政府擴建三個堆填區嘅建議有好大反彈，環境局局長黃錦星同近期接手事件嘅政務司司長林鄭月娥已不時四出游說，希望博得政黨支持，但最後都係徒勞無功，而喺缺乏建制派支持下，黃錦星日前喺立法會工務小組委員會「跪低」，撤回擴建將軍澳堆填區嘅撥款申請，但餘下嘅屯門同打鼓嶺撥款申請都表決唔到，可能佢哋仍然耿耿於懷，尋日出席立會午宴時，亦不忘講到呢件事。
設計圖片及對白
隨時阻公僕加薪
黃錦星本身已經皮包骨，有同枱嘅議員話佢坐落嚟第一句就呻自己瘦咗。有議員事後都話，見到都覺得佢幾辛苦，食咗兩啖就收到個電話，聽完又即刻去搵林鄭。究竟點解去搵林鄭？估計都係同堆填區有關。
其實林鄭亦好唔得閒，喺席間繼續游說議員支持堆填區撥款申請。據聞，佢話如果下周二嘅工務小組順利通過相關申請嘅話，相信喺下月十二日召開嘅財務委員會就會審議相關申請，咁啱公務員加薪嘅申請都係財委會議程之一，林鄭不停咁問議員攞當日嘅議程嚟睇。
又難怪林鄭咁緊張嘅，事關財委會一般先處理咗工務小組提出嘅建議，咁即係會討論堆填區撥款申請先喇，如果班泛民議員又玩拉布，堆填區申請分分鐘又表決唔到，咁公務員加薪就肯定凍過水，雖則加薪有追溯期，但本來班公僕對加薪比率已經好大反彈，如果再推遲加薪，肯定又惹起公僕不滿，到時真係一波未平，一波又起囉！
嗱！就係咁，兩個「瘦骨仙」就畀堆填區搞到冇啖好食嘞，想唔瘦都唔得喇！
