政府施政滿江紅 七一遊行必墟冚
一年容易又七一，大家估吓今年七月一日有幾多人上街遊行吖嗱？應該唔少得去邊咯！嗱嗱嗱，太一叮唔係美國走佬特工斯諾登，無咁神通廣大可以窺探國家機密，只係作為香港市民，日日睇住港府「穩中求賤，務實愚民」，唔使問都知民怨爆煲啦。
嗱，港府無能，施政每況愈下，唔係山草藥噏得就噏o架。中文大學幫港府過去一年施政埋單計數，民意調查結果係施政滿江紅，七個範疇之中五個表現肥佬，分數最低嘅係教育，只有四十二點八分，其他房屋及規劃、經濟發展、教育、環保、政制及管治亦得分低殘。至於勉強過關嘅兩個範疇係醫療衞生同民生福利，但亦分別只得五十四點七分同五十點三分，即係一樣徘徊肥佬邊緣，問你服未！
叮佢個鎯鎯，七個施政範疇居然大部分唔合格，港府無能成咁，唔怪得咁多人醞釀上街示威啦！調查仲顯示，四成六受訪者對未來一年施政能夠改善缺乏信心，三成人期望港府優先處理房屋及規劃問題。咁即係話，最多人對住屋問題不滿，而一半人對港府撥亂反正收拾爛攤子感到絕望。
唉，哀莫大於心死。施政無能都夠衰o架啦，仲要一半市民睇死你冇能力改善，呢個政府點樣維持管治吖？官逼民反，民不得不反，市民上街都係被逼嘅咋。
市民對施政失去信心，港府無得怨人，只能怨自己，鬼叫你咁無能咩。就講房屋問題吖，今屆政府上場之時吹到天花龍鳳，又話千方百計建屋，又話新界東北發展，又話見縫插針起樓。結果點呢？原來全部都係吹水唔抹嘴！填海大計阻力重重，東北美夢毫無勝算，建屋安民淪為空中樓閣，萬萬千千嘅劏房蟻民依舊屈身咫尺陋室，居住環境毫無改善，唯一變動嘅就係不斷上升嘅租金。
難為運房局局長張炳良仲好意思講，當局已盡力尋找土地，加快建屋流程，公屋興建量會有增無減。唔使大隻講嘞，如果官老爺夠膽收番晒所有權貴會所地皮起屋，太一叮就話你好嘢嘞！
講開又講，港府招惹民怨嘅手法層出不窮，翹埋雙手唔做嘢固然抵鬧，有時無事生非騷擾良民更加可惡。好似消防處咁，居然一句話收到投訴，就直闖東方報業集團總部，名為檢查伺服器房灑水系統，實為製造白色恐怖打壓正義傳媒。港府黑白不分，倒行逆施，管治想唔風雨飄搖都幾難啦！
民生凋敝事事哀，抗議劣政要上街。既然政府無可救藥，人民惟有用腳投票，太一叮夠膽講，今年七一遊行肯定場面墟冚呀！
