City Snapshot：船王「繩」畀鐵娘子
包陪慶話爸爸包玉剛見親政要，都送一條繩畀對方跳。
前排有解封文件披露，已故英國首相戴卓爾夫人曾與已故船王包玉剛就香港前途問題會面，包玉剛長女包陪慶尋日出席一個公開活動時再爆料，當年包玉剛同戴卓爾夫人會面前，提早送咗份聖誕大禮畀鐵娘子。
包陪慶話爸爸包玉剛見親政要，都送一條繩畀對方跳。
戴卓爾夫人初時拒收，經包玉剛多次要求先肯拆禮物，點知拆開一睇，原來裏面有一條跳繩，氹到戴卓爾好開心，仲猛問點解。包玉剛解釋，自己每朝都會跳繩一百下，又話國家元首要保持健康，所以佢見到美國總統列根同教宗都會送。
