擴大堆填又觸礁 垃圾圍城路不遙

係咁嘅，立法會原定尋日審批擴建三個堆填區撥款申請，點知官老爺一出場就跪低，話唔夠支持票喎，所以撤回將軍澳堆填區嘅申請。至於屯門同打鼓嶺，形勢亦唔好得幾多，喺議員拉布之下未能完成表決，要另行安排時間再議。三個擴建堆填區大計，一個丟咗落垃圾桶，兩個可能一齊陪葬，你話嘞，垃圾圍城係咪隨時噩夢成真吖？

環境局局長黃錦星話喎，希望屯門及打鼓嶺兩區嘅擴建計劃可趕及暑假前再提出，而將軍澳方案就要容後討論，強調會用最大誠意游說議員，盡快推展計劃咁話。

唉，係人都知，擴建堆填區碰壁嘅關鍵係港府無能。既擺唔平地區勢力，又搞唔掂議會政客，更加交唔出改善環境問題嘅妥善方案，咁樣就想推展大計，廢話啦！呢，有新界西議員警告，擴建堆填應該三區同步，依家將軍澳退縮，難保另外兩區嘅居民唔會同樣絕食抗爭，最終令計劃「三大皆空」！

講到呢度，太一叮難免諗起一件舊事。三年前港府計劃徵用清水灣郊野公園五公頃土地擴建堆填區，激起全城公憤，議員紛紛聲討，結果被迫跪低撤回有關方案。三年後，又係打擴建堆填區主意，又係眾怒難犯，又係腳軟跪低，究竟港府有無吸取教訓嘅呢？港府失威事小，垃圾為患事大，三個堆填區喺未來兩至六年就會爆滿，市民容乜易要瞓垃圾崗o架！

即係咁，擴建堆填區舊橋循環再用唔緊要，但都要先做好源頭減廢，確保主事官僚唔係庸碌之輩。大家知啦，香港唔止廢物多，廢官一樣咁多，唔止擴建堆填區大計被送入堆填區，廢物回收一樣變咗一件廢物，源頭減廢一樣變咗垃圾，而興建焚化爐更加講到無影無蹤。難怪有人話，垃圾圍城嘅禍源就係「垃圾圍星」，現時圍繞黃錦星身邊嘅環境官僚實在有太多廢料！

一句講晒，擴大堆填又觸礁，垃圾圍城路不遙。官老爺快快諗計補鑊，如果真係無能為力，太一叮畀橋你哋，就係將政府總部暫時充當垃圾桶，以解堆填區快將爆滿嘅燃眉之急。反正官老爺對廢物處理問題唔嗲唔吊，咪等門常開被垃圾逼爆，垃圾圍城噩夢成真，先至再諗辦法囉，叮！