豈有此理！嶺南大學繼早前那候任新校長之「黑箱作業」選出後，依家又嚟一劑醜聞，真係想唔死都唔得！

嗱！本文仲未開拖狂揼之前，我先事前申報，筆者乃嶺大舊生，但不會因「母校」情誼而有所包庇，相反，可能仲插得比其他人更狠！

話說回來，最新一樁老土事，係「持續進修學院」那邊（非屯門「總店」的「大學本部」），有件中文科男教師播放三級足本的《色，戒》，給毅進班的同學仔睇，其中有未滿十八歲的青少年（包括男女同學）。據新聞報道，該教師更重複播放床戲三、四次，要求學生留心觀察女主角「肉緊」的表情反應，並要學生隨後討論和交功課，「比較戲中女主角性交的異同」喎！

喂！呢條友，乜嘢人嚟ｏ架？我直覺佢有「性變態」傾向喎！即使無病，都好唔正常啫！有無用腦ｏ架？所以，在此強烈譴責之餘，更強烈要求教育局徹查和追究，給學生、家長和社會一個滿意答覆！

嶺南大學的「社區學院」屢出醜聞，實非「總店」之事，係因香港教育制度PK所累。早前，那個前院長馮培榮在無王管情況下，自把自為，立亂收生，搞到人太多而無課室上堂，原來，呢類文憑課程係院校「自負盈虧」方式開辦的搵錢計劃，於是亂咁收生，有「學費」畀的便擸咗先囉！亦因為學生收得多，於是又亂搵老師塞時間，遂令到師資好流，狗屎垃圾都有，咁咪出事囉！

呢個垃圾制度製造的禍害，唔單止出現嶺大社區學院，其他的大學也會陸續爆煲的！

香港教育之大零落，有排趴街！唔得掂！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook

一齊（目及）實政府

第一手消息請下載on.cc東方互動iPhone/iPad/Android/Windows Phone Apps