貪曾至今仍然逍遙法外，但衰嘢就愈揭愈多，佢又被人踢爆喺在任嘅最後兩個財政年度，買酒既多且貴，開支相等於三司十二局同期買酒量總和。咁鬼離譜，李衞當然要挺身教訓佢！

李衞︰你仲勁過葉問喇，看招！

貪曾︰咪住，我唔識打功夫，點解咁講？

李衞︰葉問都係一個打十個，你一個人買酒敵得過三司十二局，「一個頂十五個」，你仲唔係勁？唔好講咁多，看招！

貪曾︰勁咩，最多咪勁貪，我唔識武功，唔好打我……

李衞︰唔……聽聞你仲有啲存酒數量係無資料，應該……

貪曾︰應該咩，係我飲晒落肚，啲酒數梗係無紀錄！

李衞︰哦，原來如係咁，照打！

（啪！啪！啪！啪！啪！）

貪曾︰我都話我唔識功夫，點解仲要打？

李衞︰你終於肯認「走數」，呃咗香港人咁耐，我當然要幫大家出口氣！

作者：李衞

第一手消息請下載on.cc東方互動iPhone/iPad/Android/Windows Phone Apps