政壇：搞搞政：立法會屢做蝕本生意
設計圖片及對白
原來立法會間精品店開咁耐蝕足咁耐，至今蝕咗幾萬元。據講店內售賣印有立會標誌嘅產品，但銷情一直麻麻，立會行政管理委員會（行管會）討論點幫精品店止血，以免繼續蝕落去。有委員覺得現時貨品定價太低，好難有錢賺，建議唔好統一貨品嘅毛利率，應該係邊樣貨品去貨快就賣貴啲，咁先係做生意之道喎！
設計圖片及對白
亦有委員認為精品店開放時間係朝九晚六，但邊有人晨咁早買紀念品呢？所以建議推遲開舖時間，寧願做少幾個鐘生意，起碼慳番唔少皮費。睇嚟立會秘書長陳維安真係要好好諗吓應該點做嘞！
律師費益咗李漢奸
除咗開源之外，都要節流先得。話說立會喺○九年成立專責委員會調查梁展文事件，當時因為新世界發展相關人士未有出席會議應訊，雙方因而對簿公堂，雖然立會已聘請律師處理，但議員「長毛」梁國雄竟然另聘律師，而行管會竟然同佢「癲」，決定貼二十幾萬元畀佢做律師費，而長毛益嘅就係身兼大律師嘅「李漢奸」李柱銘，納稅人啲公帑使得認真冤枉。
其實精品店目的係志在推廣立會形象，唔一定要賺大錢嘅，但既然可以使埋啲冤枉錢畀長毛打官司，點解精品店蝕嗰幾萬元就咁緊張呢？立會咁多做生意嘅議員，究竟佢哋條數點計嘅呢？
