政壇：陳婉珍善用中藥廚餘
陳婉珍重視環保，力推將中藥藥渣製成有機肥料。
東華三院主席Ina陳婉珍上任冇耐就有新搞作。原來東華三院轄下嘅中醫專科門診，每日都烹煮大批中藥，就咁丟棄會好浪費，所以早前佢哋就同浸會大學合作，研究將中藥藥渣進行廚餘堆肥，生產有機肥料。佢話研究成功嘅話，可以減輕堆填區負擔。面對做主席後數之不盡嘅會議，Ina從未呻過一個攰字：「我同董事局講，重要嘅會議，盡量唔好安排喺我需要照顧老公何鴻燊嘅日子，其他時間，幾忙我都唔介意。」
陳婉珍重視環保，力推將中藥藥渣製成有機肥料。
回想加入東華三院七年嘅難忘回憶，佢話幾年前遇上一位品學兼優嘅窮學生，恐難圓大學夢，聽見後即與董事局成員商量，拍心口承諾：「就算佢（學生）最終拎唔到獎學金，我願意供佢升學。」最終Ina私人掏腰包資助對方讀書，該學生後來喺會考中考獲7A，不負所望。
佢笑言，希望自己子女都好似該位窮學生一樣，有顆堅毅不屈的心，所以從小教仔講心唔講金。三個子女愛食炸雞翼、焗鹹雞，Ina專登拜師學藝；照顧老公，一樣周到，為此學煮中西及葡國名菜。到底何鴻燊最愛係乜嘢菜式？佢甜笑話：「梳夫厘焗魚同摩囉雞飯。」聽見都流晒口水。
