司法公平非口號 不容貪官續逍遙
香港號稱法治社會，似乎冇吹牛，前發展局局長麥齊光欺詐政府房津被判罪成，難逃牢獄之災，更有小市民因為貪「五毫子」搞到周身蟻。表面睇，香港真正體現對貪污「零容忍」，但睇真啲，法律面前因人而異，達官貴人無論幾咁貪婪大咬，一樣可以逍遙法外o架！
嗱嗱嗱，最近接連有多宗因小失大嘅案例發生。既有的士司機多收乘客五毫子而被控濫收車資，又有菲傭被指買豬肉「打斧頭」十五元而被告上法庭。更有位東區海底隧道收費員，因為工作期間執起一個一蚊銀放入褲袋，結果被控盜竊罪成，打爛飯碗兼痛失多年退休金。至於麥齊光咯喎，自己丟官晚節不保也就罷了，仲連累數十年官場老友隨時判囚並喪失數百萬元退休金與長俸，真正係貪字得個貧。
大貪係貪，小貪都係貪，依法辦事本來無可厚非，問題係，當局係咪一視同仁呢？如果貪一元五角係罪，咁前特首曾蔭權爵士貪盡海陸空應該點計呀？前廉政專員湯顯明濫用公帑瘋狂送禮，豪飲豪食豪遊，呢筆爛帳又點計先？
其身不正，何以正人？身為政府高官，有法不依，知法犯法，理應罪加一等。呢，前陣子一位被譽為「明日之星」嘅警司，不過貪咗四千蚊嘅飲食折扣同埋一支威士忌，就被裁定公職人員行為失當罪成判囚一年，仲即時收監添。若根據同一判案準則，貪曾同貪湯呢對難兄難弟，遠遠唔止貪四千蚊，仲破壞廉政法治嘅核心價值，怕且要判終身監禁嘞啩！
可惜現實係荒謬嘅，廉署立案調查貪曾已經超過十五個月，查來查去依然得個吉，對公眾更加係零交代。貪湯喺立法會做完「大龍鳳」之後，拍拍屁股繼續風流快活。反觀嗰位東隧職員，由事發至判刑，一星期搞掂。就算麥齊光詐騙租津，亦係極速被捕，極速審判。同人唔同命，同遮唔同柄，「香港速度」可快可慢，刑不上「絕代雙貪」，難怪有立法會議員質疑當局只打蒼蠅唔打老虎。
計太一叮話齋，香港競爭力每況愈下，廉潔度排名愈墮愈後，罪魁禍首就係貪曾同貪湯呢兩兄弟。唔想香港繼續沉淪，廉署就必須將呢兩個敗類繩之以法，唔可以一拖再拖。總而言之，香港係法治之區，「法律面前人人平等」唔應該淪為假大空嘅口號，香港市民絕對唔容許當局姑息養奸，叮！
