健身室無掩雞籠 康文署自廢武功
潮流興健身，時下都市人上健身室隨時多過上茶樓。無他嘅，女人唔補好易老，肌肉唔操好易無，勤加鍛煉，保持狀態，始終係塑造健美體形同預防機能衰退嘅最佳方法。嗱嗱嗱，官僚系統一樣o架咋，一旦警覺鬆懈，疏於管理就會百病叢生醜態畢露o架嘞，肌肉鬆弛都係事小，部門管理鬆弛先至大鑊呀！
嗱，康文署就係樣辦嘞，轄下體育館健身室居然變咗無掩雞籠，任由用家自出自入玩「霸王GYM」，管理粗疏成咁，都算係官僚肌體中最篤眼篤鼻嘅肉酸部位咯。
叮！體育館健身室唔係應該有康文署職員駐守嘅咩？無錯，理論上係有，但現實上係無，或者有等於無。網上近日廣傳，部分康文署健身室無職員看守，用家即使無證無租場，一樣自出自入任玩唔嬲。留言仲鼓勵網友唔使畀錢幫襯私人健身室，一於去呢啲公共健身室食霸王餐！
嘢唔可以亂食，健身亦唔可以亂玩。本報記者巡查全港多間體育館健身室，發覺好多真係變晒無掩雞籠。有啲擺空城計，檢查櫃枱人去位空；有啲就算有人把守，亦一一化身紙板公仔，唔係掛住睇雜誌，就係索性懶查證，根本無人盡責履行把關工作。咁即係話，健身室無王管，唔理你係訓練有素嘅筋肉人，定係毫無經驗嘅瘦骨仙，只要你行得郁得就可以入去一試身手，玩跑步機又得，練擴胸器又得，如果閣下天生神力，將啞鈴當波拋亦得，得咗。
有無搞錯呀？健身室變無王管，萬一害到市民受傷，邊個負責呀？場館使用規則訂明，市民必須參加過使用器材簡介會至可以購票入場，依家制度形同虛設，一來令庫房失血，二來令市民容易受傷，康文署擺明失職啦。
當然啦，成件事令人最不安嘅係，反映港府部門紀律廢弛，無規無矩。高層施政瞌眼瞓，中層管理懶懶閒，咁樣下層梗係做嘢亂咁嚟啦。做開健身嘅人都知，肌肉承受壓力至會變得強健，如果康文署只係一塊荒置鬆懈嘅孱弱肌肉，又點能夠有效運作呢？
講開又講吖，體育館健身室管理廢弛唔係一朝一夕嘅事，早年就被審計署狠批管理不善，使用率低。嗱，康文署署長馮程淑儀，你唔好話畀大家聽，康文署縱容做霸王GYM係為咗提升健身室使用率呀！
健身室變無掩雞籠，康文署等如自廢武功。馮程淑儀咪掛住拆走屋企嘅「空中花園」僭建物，就睇漏康文署入面嘅人肉僭建物呀，如果唔係，小心畀人當成官場贅肉，一刀切走，叮！
