政壇：張茵被傳離婚證實流料
張茵
玖龍紙業好多員工都話，董事長張茵個樣好有福相，成日見佢同老公嗌飯堂送飯菜去辦公室，邊傾公事，邊撐枱腳，好sweet，點知尋日朝早傳出佢哋已經離咗婚，咁大件事，公司喺中午十二時二十五分即刻出澄清聲明，話董事會注意到近日若干報道，話公司董事長張茵同丈夫、執行董事長兼行政總裁劉名中經已離婚。公司就呢件事已諮詢張茵同劉名中，指報道為錯誤同完全唔正確，以及對佢哋婚姻嘅評論為冇事實根據同嚴重失實。
張茵
市值二百一十六億元嘅玖紙，尋日股價跌百分之一點九。市場咁關注呢件事，係因為舊年內地地產界女首富，龍湖地產主席吳亞軍同丈夫離婚，一度影響投資者信心，股價都有壓力。所以，既然係流料，就梗係極速否認喇，呢排內地好多「空軍」，容乜易畀人用嚟做藉口，沽到個股價殘晒。
張茵同丈夫劉名中結婚已超過二十年，劉平日較少露面，認識張茵之前仲係一名牙醫，雖然外界睇落張茵名氣大啲，○六年仲登上胡潤百富榜榜首，以二百七十億元人民幣成為中國第一位女首富，但張茵就曾經講過佢同老公工作上只係分工唔同，丈夫負責企業發展同技術改造，而佢就負責整體營運管理，無分高低喎。
