政壇：一舊雲炒舊料博曝光
設計圖片及對白
特首CY梁振英上任快將一年，成績如何，各方都有唔同意見，最公允點評方法嘅梗係讓數字說話。白鴿黨嘅立法會議員「一舊雲」黃碧雲尋日就拋出一系列數字，話要檢視CY班子過去一年嘅施政質量喎，但原來所有數字都只係翻炒歷年香港大學民意研究計劃嘅調查數據，認真物盡其用。其實一舊雲都就快做咗一年議員，但就仲喺度炒舊料博曝光，唔知各位九龍西嘅選民又點評價呢位議員嘅議政能力呢？
設計圖片及對白
炒冷飯難獲市民認同
一舊雲尋日憑住一堆舊數字，話部分局長嘅淨支持度更加係連續多月錄得負數，除咗食物及衞生局局長高永文好過上任局長周一鑊，工作較得到市民認同外，整體各官員嘅表現都不及前朝同期。所以佢嘅分析結果係，政府應「給香港一條活路」咁話。
佢仲愈講愈起勁，又批評問責制儘管已經推行多年，但現今睇嚟仍然成效不彰，政府仍然無法藉問責制為香港成功培育政治人才，各局長嘅能力普遍而言仍無法得到市民認同，可見問責制是愈嚟愈失敗，政府應盡快檢討其用人方針，並向市民問責。
雖然一舊雲嘅建議有啲行貨，但聽落又有幾分道理，至少白鴿黨今次都應該聽吓一舊雲嘅意見。事關白鴿黨已成立多年，但對培訓新丁議員仍然成效不彰，部分新丁曝光率只能喺低位徘徊，有新丁議員仲要靠炒冷飯爭曝光，難以獲得市民認同，旨意佢為香港爭取民主，可見只會愈來愈失敗，白鴿黨應盡快檢討其培訓議員方針，並向市民問責，「給香港一條活路」嘛！
