翻閹副手為偷懶 廢官一嶽大花筒

話說周一鑊日前首次以平機會主席身份出席立法會簡報，但主要唔係匯報工作，而係攤大手板攞錢，話平機會有唔少新工作，必須向政府申請新資源喎。佢仲預告，有意重新招聘凍結咗十三年、月薪逾十萬元嘅行政總裁職位，分擔佢嘅工作量咁話。叮佢個鎯鎯，周一嶽翻閹唔夠三個月，乜都無做過就話攞錢開位請副手，咁仲唔係巧立名目方便自己偷懶？

即係咁，周一鑊有鋪官癮大家都知，但你當自己做緊皇帝日理萬機需要文武滿朝呀？港府每月耗費超過二十萬元公帑，翻閹你呢個廢官做平機會主席，已經係浪費納稅人血汗錢啦，依家仲話要減輕工作量，簡直搵笨！

所以話，周一鑊發開口夢話攞錢請人，只能曲賤和寡，自取其辱。市民眼睛係雪亮嘅，嗱，「東方報業民意調查」顯示，對於周一鑊一方面呻平機會唔夠錢用，一方面打算重開行政總裁職位，三成六受訪者認為資源錯配；兩成八質疑佢巧立名目方便自己偷懶；一成九認為無善用公帑處理反歧視工作。

周一鑊一邊呻窮一邊想大灑金錢請副手，唔止侮辱市民智慧，更加侮辱民意。平機會當初點解取消行政總裁職位呀？就係要精簡架構、節省開支，雖然政府其後兩次重提重設有關職位，但都因為被民意反對而擱置，周一鑊舊調重彈，係咪當民意無到先？周一鑊打骰食衞局八年，亂足八年，搞到鑊鑊新鮮鑊鑊甘，家陣入咗平機會，又無事生非，有破壞無建設，唔通仲嫌自己個朶唔夠臭咩？

話時話，臭罌出臭草，平機會前幾任主席都唔好得幾多o架咋。濫用公帑，用人唯親，管理混亂，工作敷衍，能夠數得出嘅官場醜聞都幾乎有齊，周一鑊爆「懶」接任，即係青出於藍勝於藍咁解。

所以咯喎，民調同時顯示，對歷屆平機會主席被指大花筒，四成三人指反映公帑運用一塌糊塗；兩成五人斥平機會應檢討；兩成一炮轟行政管理混亂。

咦，反正周一鑊怠惰成性，懶得就懶，不如咁嘞，索性將平機會摺埋，咁佢咪可以一懶到底囉，叮！