一個拾荒婦十多年來，靠每天在香港街頭執紙皮，長年勞苦，養大四兒女。

這日，拾荒婦因要去廁所，將載滿紙皮的手推車臨時停泊在公廁外，點知，如廁出來，那手推車連紙皮已被食環署外判清潔工以阻街之名，充公了！並用鐵鏈鎖於垃圾站內。拾荒婦向外判工解釋、哀求取回搵食架生無效，即場捶胸嚎哭：「我不是偷，又不是搶，為乜你哋（食環署外判工）唔肯放我一條生路……」現場外判工反指拾荒婦「企圖盜竊」，報警拉人。

拾荒婦情緒激動，不適送院檢驗。事發時，有途人目睹過程，不值外判工所為，更有好心人為安撫拾荒婦，送二百元作買她的紙皮費，但該婦拒收，為的是「事實真相與公道」和「最後一點尊嚴」。

事實真相係點呢？原來，事發前的早上，拾荒婦曾與公廁的外判清潔工人起過爭執……如果係咁！高永文，麻煩你睇吓有無人「假公濟私」、「恃勢凌人」、「以權行兇」嘞！

食環署外判工用「阻街」之名，沒收阻路物，咁上水火車站一帶，大大堆等水貨客提貨的奶粉屎片衞生巾擺滿街，你哋唔去拉人？銅鑼灣和旺角行人專用區日夜見電訊商的非法攤檔塞住晒，你班友仔又睇唔睇到呢？仲有，嗰個廢柴政府啲垃圾官員落區做騷，更有損市容啦！唔該你哋去執行任務，掃除垃圾，清潔香港！

話時話，今劑食環署外判清潔工竟可行使權力「執法」，是否有點古怪？佢哋有無受過法律教育培訓和考核的呢？何解「執法」會有外判？遲啲，警隊會否外判呢？香港的法治和法制是甚麼怪物嚟o架？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps