政壇：搞搞政：擴堆填區闖關 環局新丁「考牌」
設計圖片及對白
政府擴建三個堆填區嘅撥款申請，後日過第一關，喺立法會財務委員會嘅工務小組委員會投票。最新狀況係手握七票嘅建仔經一輪扭擰後決定支持，而大力反對嘅葛珮帆身在英國。工聯會聲言反對，但王國興當日有會要開，真正投票反對嘅只有陳婉嫻同麥美娟。除非醫學界梁家騮突然反對，否則撥款可以十五對十三「險過」。
設計圖片及對白
今次建制派主要由政務司司長林鄭月娥出面游說，而泛民方面就交畀有民主派背景嘅環境局副局長陸恭蕙，佢本來有一絕招，就係搵工黨副主席何秀蘭做中間人，因為佢哋九十年代尾已相識，大家都係走環保路線，同聲同氣。佢諗住透過何秀蘭統一各泛民政黨嘅「開價」，然後政府可一次過「回價」，咁就一次撬走十幾票。
可惜呢招行唔通，惟有逐個政黨約見。好彩陸恭蕙成功打動到資訊科技界莫乃光支持，連公文袋都話有商量。但佢最終係咪「考牌」成功，就要睇下有乜泛民投畀政府喇，如果喺無泛民支持下都成功通過撥款，就證明「陸恭蕙」呢三隻字都係浪得虛名。
再講，大家有無發覺一眾環保團體都無出嚟反對呢？聽聞出身自地球之友嘅環境局政助區詠芷暗地發功，私下同班環團講好數，令班環團就算唔出聲撐政府，都唔會大力反對擴建堆填區。若果呢次夠票通過，區詠芷就係另一功臣嘞！
