政壇：少年Ben浴缸奇幻漂流
陳恒鑌（右）以少年PI造型奪取特色造型大獎。
國際龍舟邀請賽同壓軸嘅名人扒浴缸大賽，終於喺陰晴不定嘅天氣下結束。事前揚言少布上陣嘅立法會議員Ben陳恒鑌，尋日化身成榮獲多項奧斯卡殊榮嘅電影主角少年PI搶鏡，同披上老虎皮嘅隊友成功捧走特色造型大獎。少年Ben扒浴缸時亦體驗好似電影一樣嘅奇幻漂流情節，比賽開始時，佢唔知係咪因為心急發錯力，搞到隻浴缸無啦啦「漂流」去其他賽道，幾經辛苦先返回原來航線。
陳恒鑌（右）以少年PI造型奪取特色造型大獎。
至於被視為「沉船」高危人物嘅金融服務界張華峰，尋日就頭戴鴨帽身穿鴨衫繼續為港人帶來歡樂。雖然噸位十足嘅佢冇一如所料跌落水，但佢同隊友就因為太重磅而令到浴缸唔識郁，即使兩人起勢咁扒，仍然被其他對手遠遠拋離。雖然佢最後包尾衝線，但仍然無損佢向圍觀市民大派膠鴨嘅心情，佢仲建議大會下年增設最重磅參賽者大獎，聲言自己攞硬第一喎！
賽果方面，練習時跌過落水嘅「小學雞」單仲偕憑住凌厲後勁以三十五秒首先衝過終點，肥鴨峰就以兩分二十三秒排包尾。
