政壇：邱誠武搞爛gag氹自己

十八、廿二卜卜脆嘅青春日子，年紀大嘅人特別容易懷念，運輸及房屋局副局長邱誠武就係人辦。早前佢同食物及衞生局副局長Sophia陳肇始前後腳出席同一場合，佢一見到Sophia就好熱情上前打招呼，仲搞爛gag話Sophia掌管衣食，佢就負責住行，見到佢哋兩個就衣食住行齊晒喎！咁仲未夠，邱副繼續開玩笑話，佢嘅辦公室喺政府總部廿二樓，而Sophia就喺十八樓，所以佢哋一個十八、一個廿二。無奈佢哋年紀都已經過咗五張嘢，搞吓笑，咪當氹自己開心囉！