政壇：建制缺悍將 論壇鬥隱形

邀請十個 十個拒絕

建制派缺悍將嘅情況其實喺上星期四一個通識教育研討會已初見端倪。話說上星期四教協同教院一齊搞咗個通識教育論壇，主題講香港有無條件推行普選，大會主持當時就透露，搵極都無建制派人士肯出席，搵十個十個都唔肯嚟，好彩有第十一個建制派代表、行會成員張志剛撥冗出席。張志剛當時仲話如果第日再搵唔到人，不妨搵佢。可惜佢之後喺論壇上說漏嘴，自爆行會無討論過普選時間表，唔知係咪呢個原因，搞到佢要退隱一排，尋日城市論壇佢都無再去。

有人唔敢去，有人就想去都無得上台講。話說富貴黨無派員上台做講者，但係半個維園常客嘅富貴黨邵家輝就風雨不改去撐場，仲幫黨平反話，雖然黨內大佬唔得閒，但黨內基層好樂意出席做講者咁話。不過聽聞今次嘅講者名單有一定門檻，指明黨副主席以上嘅代表先可做講者。喺缺悍將嘅情況下，最後補上嘅係立法會前工程界議員何鍾泰，主持仲當佢係特別嘉賓咁喺節目開始先邀請佢出場，真係畀足面。