救生員集體請假 康文署草菅人命
夏日炎炎，又係碧波暢泳嘅好時節。不過太一叮想提醒各位，如果大家準備去康文署轄下嘅公眾泳池，出發前記得打個電話問吓，事關今時今日，救生員經常失驚無神集體請病假，泳池隨時閂門，若果去到先至食閉門羹，望池興嘆，好掃興啫。
唔係講笑，家陣啲救生員真係好易「病」o架。呢，九龍公園泳池兩個禮拜前有六名救生員集體請病假，其中四個泳池被迫關閉，尋日更有三十幾個即大約九成資深救生員集體請病假，成個泳館得番一成資深人手，只好臨時拉伕頂檔，搞到部分設施陷於癱瘓。愈嚟愈多救生員集體「生病」，再咁落去，容乜易搞到全港公眾泳池關門大吉，市民冇水游o架！
月有陰晴圓缺，人有三衰六旺，有病唔出奇，奇就奇在，適逢游泳旺季，同一個泳館竟然有三十幾人同時請病假，咁就太不可思議喇，究竟佢哋患咗咩病呢？
其實，成班救生員火氣旺盛，精神奕奕，睇怕係心病居多。早幾日之嘛，救生員不滿人手不足，先至發起靜坐抗議，要求康文署增加人手，減輕前線壓力。可惜啊，康文署高官借咗聾耳陳隻耳，一概聽而不聞，你有你投訴，佢有佢懶理，卒之咪逼到救生員集體請病假咯。嗱，有位告假救生員講到明，如果當局再唔正視問題，唔排除繼續請假甚至將行動升級添。
講開又講，泳池人手不足已經唔係乜嘢新聞，幾乎年年如是，亦幾乎年年引發救生員集體病假事件，而市民就年年變咗磨心。最離譜嘅係，近年康文署唔止冇增加人手，反而進一步將全港救生員減到約一千二百個，比正常編制少三百幾人。根據國際標準，一個泳池起碼要有四個以上救生員，而香港公眾泳池即使齊人開工，每個泳池亦只得兩個人睇檔。每逢旺季，成個泳池人山人海，隨時睇漏眼，萬一發生意外，你話呢隻鑊邊個孭得起吖。
正所謂，欺山莫欺水，救生員人手絕對唔慳得。就講本月初之嘛，一位六十六歲老伯喺鞍駿街公眾泳池遇溺，結果都係多得救生員及時發現救番。康文署削減救生員，簡直係草菅人命！
一句到尾，救生員變相罷工攞市民做籌碼固然唔好，康文署管理不善更加係罪無可恕。康文署署長馮程淑儀，唔好顧住僭建豪宅不理正事啦，快啲同救生員四四六六拆掂佢，如果連咁簡單嘅事都搞唔掂，不如自動消失讓賢啦，叮！
