Sun奇古怪：Sun潮語：「阿寶」
人類之所以要讀歷史，好大程度上係要從過去之中吸 取教訓，避免重複犯上過往嘅錯誤，亦同時借古鑑今。可惜人類係一種奇怪嘅動物，明知係錯都總係重複再犯，歷史不斷喺度重演再重演，人類嘅悲劇，只會好似米蘭昆德拉嘅名言一樣「永劫回歸」。唔知係咪因為咁，橫掂人類讀歷史都無用，所以特區政府喺幾年前，就取消咗中國歷史科為初中必修科目。就連科幻動畫中，講到人類已經進化到喺太空創建殖民地，可以發明出機動戰士，並已經有新類型人「阿寶」嘅出現，但係人類始終要重複相同嘅錯誤。
相信好多七、八十後，甚至六十後，都唔會唔識七九年面世嘅日本經典動畫「機動戰士GUNDAM」，更唔會唔識裏面各款高達機械人。識得高達就冇理由唔識「阿寶」，因為佢就係第一代高達嘅駕駛員，仲係「機動戰士」動畫嘅男主角。咁點解「阿寶」變成潮語呢？事緣係「阿寶」喺八五年推出《機動戰士Z高達》第三十六集，有句經典對白「人類總要重複同樣的錯誤」。呢句嘢喺幾年前被網友截圖，並廣泛利用嚟恥笑一啲膠人或佢哋做咗一啲膠事。所以，話人「阿寶」其實唔係話人好似高達駕駛員咁英勇，而係恥笑人犯上同樣嘅錯誤，亦有恥笑別人低智能嘅意思。同一道理，立法會主席面對激進派拉布而再次剪布，你亦可以稱呼佢為「剪布阿寶」！
值得一提嘅係，「阿寶」原名係Amuro Ray，中文名應該係CCTVB當年幫佢起。將日本動畫人物改中文名，都係香港本土文化特色，例如足球小將主角「大空翼」，喺香港就變成「戴翅偉」；超時空要塞嘅主角「一條輝」變咗「馬輝」。唔止動畫，外國電視劇嚟到香港，一樣會改中文名，例如《青春火花》個歹角，日文原名「樁麻理」，中文名變莊馬莉，係咪親切好多呢！點都好過將碧咸David Beckam，譯做貝克漢姆，真係斗零品味都冇……真係譯名「阿寶」!
