曾智明(左一)見老父曾憲梓嗌口號太激動,急急護送老父離開。

「佔領中環」(佔中)行動已成本地政圈焦點,前全國人大常委曾憲梓尋日出席活動後,忍唔住炮轟佔中破壞香港法制、金融、商界,令市民唔方便,對香港無好處,又話佔中最終目的係破壞一國兩制。講到佔中發起人之一嘅港大法律教授戴耀廷,曾憲梓就話戴只係「象棋子嘅水平」,之後再高呼「反對佔中,中央支持香港發展」嘅口號。

曾智明(左一)見老父曾憲梓嗌口號太激動,急急護送老父離開。

曾憲梓嗌咗一陣口號,大仔曾智明可能擔心老父太激動,唔夠空氣會頭痛,即時護送坐住輪椅嘅老父離開會場。心水清嘅人都發覺,曾憲梓尋日講七一時口氣溫和,話遊行係好事,不論支持政府同反對派都可以表達意見。

另外,前選舉管理委員會主席胡國興尋日出席一活動後,被問及有支持佔中人士曾自爆手提電話有怪聲,懷疑被人勾線竊聽。曾任截取通訊及監察事務專員嘅胡國興就話相信無乜可能,原因係佢哋(佔中支持者)清晰講咗會有咩行動。咁美國中央情報局前特工斯諾登大爆美國秘密監控又點睇呢?佢趁此機會大讚香港係最安全地方,因為本港有《截取通訊及監察條例》,法例本身參考英國等多個國家而制訂,反而英國周街都係閉路電視,疑似寸爆英國監控情況嚴重。

第一手消息請下載on.cc東方互動iPhone/iPad/Android/Windows Phone Apps