政壇：劉健儀呻畀黨友呃
設計圖片及對白
舊年立法會選舉後，政黨勢力大執位，富貴黨席位減少，該黨議員鍾國斌（Felix）尋日出席一個青年人活動時，就擒擒青做推銷員，話年輕人嚮往自由，應該加入自由黨喎！不過佢只顧做推銷，輪到活動嘅焦點，即模擬立法會辯論環節時，佢就甩底，搵咗佢哋黨主席劉健儀（Miriam）上陣。但佢哋事前溝通似乎有問題，已退下火線、離開立法會嘅Miriam矇查查咁，到場先知要參加辯論，雖然唔係大場面，但Miriam接咗個燙手山芋，惟有呻畀Felix呃咗。
設計圖片及對白
借通識科打開話題
香港青少年領袖發展協會舉行第六屆香港模擬立法會活動，邀請咗多個政黨及議員到場，Felix主動以同學生哥有密切關係嘅通識科打開話匣子。話早排有個叔伯嘅孫女對拉布呢個議題好有興趣，佢妙解︰「一卷布太長就拉極都拉唔完，咁就惟有剪咗佢囉。」在座嘅學生哥聽完Felix咁講都哈哈大笑。
啲學生本來最想睇吓議員現場辯論，點知一班到場者就好肉酸，民建聯曾鈺成、李慧琼同陳恒鑌尋日都有出席主禮，不過一到辯論環節就閃人，激到同場參與辯論嘅白鴿議員劉慧卿好慶，鬧建仔嘅快閃者係「逃兵」，佢話：「雖然係模擬辯論，但都應該有啲火花，同我最大火花嘅應該係民建聯，但偏偏全部走晒！」
其實班議員喺議會都慣咗交鋒喇，既然係模擬立法會活動，又點少得辯論呢﹖俗語都有話做戲都做全套，但啲議員就只係識硬銷，香港政治缺乏新血，怪得邊個呀﹖
