僭建黨知法犯法 屋宇署官官相護
香港勝在有正義傳媒，將牛鬼蛇神統統曝光喺太陽底下。呢，隨《太陽報》附送嘅最新一期《好報》又有猛料，今次踢爆高官僭建醜聞，又係涉及曾朋友，果然係鼠蛇一窩。
呢位曾朋友係邊個？咪就係被視為煲呔曾爵士愛將、有官場「金童玉女」之稱嘅康文署署長馮程淑儀囉。佢同丈夫持有嘅跑馬地一個豪宅，頂層有個涼亭，猶如綠葉婆娑嘅鬧市空中花園，原來係危機四伏嘅僭建物。正如專家話齋，呢類位於高樓頂部嘅僭建物，隨時可能頂唔住風吹雨打跌落街，殃及途人。咁大個僭建物戙喺天台，唔通屋宇署睇漏眼？
叮！睇漏眼係假，故意放生就真。有「煲呔契女」之稱嘅馮程淑儀同丈夫○七年購入物業，○八年就畀屋宇署發現天台樓梯有僭建，於是向業主發出還原命令。結果點呢？樓梯就還原咗，點知另外又僭建咗個涼亭，天台被打造成空中花園，問你服未。
更奇怪嘅係，涼亭一○年已經存在，屋宇署一一年修例擴大優先處理僭建物涵蓋範圍，居然放過呢個咁明顯嘅僭建物。直至本報記者追問呢件事，馮程淑儀仲一味耍太極，點知第二日就即刻搵人拆卸，你話係咪蠱惑吖。
咁多巧合發生喺貪曾任內，難免令人質疑，呢位「曾朋友」恃住有人照，完全當屋宇署冇到，知法犯法；而有關部門就偏私枉法，對自己友網開一面，擺明官官相護。正如有學者話齋，高官喺屋宇署發信之後仲加建僭建物非常罕見，畀人直覺係「想挑戰法治」。
所以話，「曾朋友僭建黨」簡直無法無天，成班前朝高官圍威喂互相包庇，互相照應，視法例如無物。曾爵士其身不正，半山「祖屋」被揭發違例圍封露台，手下高官有樣學樣，個個唔執輸。最離譜係前食物及衞生局局長周一嶽，佢位於港島加列山道嘅豪宅被本報踢爆違規用玻璃板封咗個露台，拖咗近一年至動工拆卸，到依家仲鬼鬼祟祟用棚架封住，都唔知有乜嘢唔見得光嘅秘密。
梁振英政府口口聲聲要撥亂反正，咪話太一叮唔提醒，千祈唔好大隻講吖。嗱，法律面前人人平等，僭建小型工程最高可以判處兩年監禁，或每日罰款五千大元，唔該屋宇署揸正嚟做，唔好再玩包庇放生喇，否則「法治之都」隨時變「法治之恥」嘅咋，叮！
