SUN奇古怪：SUN潮語：揩爬
潮語 「揩爬」都係譯音類潮語，本身係英文hyper嘅粵語譯音。Hyper喺字典解釋係高度緊張，亢奮或過度興奮嘅意思，潮語話人「揩爬」都係話一個人突然好似發咗癲咁失去自控能力。通常嗰一啲派對當中，好多人都會出現「揩爬」嘅情況，有時未必係受酒精影響，可能只係希望透過 「揩爬」嘅行為，去引人注意。唔止喺派對中會有人藉「揩爬」去引人注意，喺職場或者喺辦公室裏面，每當有新老細新上司上場，好多急於上位嘅打工仔女都會喺開會時表現「揩爬」去吸引波士注意。老闆講句無聊嘢，有啲下屬就「揩爬」大笑，呢啲例子都屢見不鮮。
今年七．一有幾多人出嚟遊行仲係未知之數，不過睇嚟就真係有好多人唔想香港人去遊行。因為已經有人組織起商戶，喺七．一當日下晝提供飲茶同購物優惠，唔係……係小恩小惠至真！因為啲優惠內容係以師奶品味出發，啲着數係近乎睇唔到。其實都好嘅，一家人咪兵分兩路，阿爸帶仔女去遊行，阿媽去買嚟攞着數，似乎都幾OK。另一樣疑似七．一維穩行動，就係七．一當日下晝舊啟德機場跑道會開show，表演者係一班韓國明星同本地兩隊樂隊，其中一隊係喺反國教集會演出過嘅RubberBand。網民知道呢個消息之後好超「揩爬」！不過係「揩爬」哋鬧爆RubberBand！鬧佢哋玩搖滾，就唔應該去維穩！咦？搖滾……維穩……又幾押韻喎。
講到「揩爬」其實最難搞都係小朋友，尤其係男仔，當佢哋曉行曉走開始就係家長們嘅噩夢。啲「揩爬」細路無論去到邊都會帶嚟毀滅性嘅效果，不過如果太過「揩爬」就要注意，因為可能真係有機會係過度活躍症嘅病徵。唔好好睇住嘅話，可能會變成最近有個經常自拍極「揩爬」短片放上網嘅十七歲少年咁，因拍片恐嚇感化官而判監，咁就唔方唔「揩」。
