政壇：政商定格：龔家姊妹撐新社聯籌款
龔中心（左）及龔因心出席新社聯晚會，列席台上做嘉賓。（何天成攝）
新界社團聯會（新社聯）日前喺荃灣如心酒店搞咗個籌款晚會，除有一班新界地區嘅朋友出席外，仲邀請咗多名港區全國人大代表及官員，連華懋慈善基金嘅龔氏兩姊妹龔中心及龔因心都有現身，可能晚會場地喺華懋個主場啩！既然係籌款，梗係要奇招盡出，既要拍賣字畫，聯會幾個負責人更要客串棟篤笑，個活動最後籌得二百萬元，距離目標五百萬元仲差一大截。
龔中心（左）及龔因心出席新社聯晚會，列席台上做嘉賓。（何天成攝）
陳勇同高佬賢（右）表演棟篤笑。
棟篤笑嘅主角係新社聯理事長陳勇同立法會漁農界議員何俊賢（高佬賢），高佬賢不斷呻苦，話自己生得高，細個要打斜瞓，依家就要訂造床。陳勇就話向來唔敢企喺高佬賢隔籬，但睇完拿破崙傳及鄧小平傳之後，當堂自信返晒嚟喎。佢哋爆肚引嚟陣陣笑聲，大犧牲之餘都畀咗大家好多歡笑。
