政壇：搞搞政：哪吒咖喱飯絕食鬥一番
設計圖片及對白
特區政府下個禮拜就會將堆填區計劃提交立法會，希望速戰速決，雖然環境局局長黃錦星早前先用「垃圾圍城」嚟恫嚇市民，但支持堆填區嘅形勢仍冇乜變化，地區政圈人士更出盡法寶博加分。好似西貢區嘅當區議員「哪吒」方國珊同身兼立法會議員范國威（咖喱飯）就鬥得好激烈，尋日一個話要絕食，一個話要斷食抗議將軍澳堆填區。
設計圖片及對白
哪吒失落今屆立法會新界東議席，但喺西貢區卻係得票最多嘅候選人，今次固守大本營，咖喱飯當然唔敢鬆懈，聯同其他泛民主派區議員展開以「斷食」對抗哪吒嘅絕食。咁到底斷食同絕食有乜唔同？有網民解釋話，「斷食」可以話係鍛煉身體、心理及靈性嘅方法，期間可以飲用液體飲料，而且係有限期嘅。「絕食」係一種抗爭，可以無限期咁唔食嘢。
佢哋呢頭鬥餐死，好笑嘅係宣傳海報卻幾乎同出一轍，兩張都係黑底白字，而文字嘅附近再加幾滴紅色嘅油漆，疑似血的暗示，驟眼睇，真係相似度有九成，真係唔知邊個抄邊個喇！
