政壇：張有興斥貪曾浪費西九
鍾樹根（前排左一）尋日邀請昔日市政局同僚參觀立法會大樓，年逾九十歲嘅張有興（前排左二）依然老當益壯。（受訪者提供）
立法會新大樓尋日有批特殊參觀者，回歸前曾任市政局議員嘅立法會議員鍾樹根，邀請咗十位昔日嘅市政局同僚參觀立法會新大樓，又喺宴會廳享用午膳，當中包括年逾九十歲、但望落仍然非常精神嘅前立法局議員張有興。鍾樹根引述午宴情況，話張有興非常關心西九文化區施工進度，中氣十足咁大鬧上屆政府對發展西九漠不關心，任由得四十公頃土地曬足十幾年太陽。咁講法，「貪曾」前特首曾蔭權爵士要負最大責任。
鍾樹根（前排左一）尋日邀請昔日市政局同僚參觀立法會大樓，年逾九十歲嘅張有興（前排左二）依然老當益壯。（受訪者提供）
張有興之後又批評現任特首梁振英（CY），遲遲唔肯兌現上任後多啲落區嘅競選承諾，佢話CY競選時多次講過當選後會攞摺櫈 同筆記簿落區聽市民意見，但上任後似乎就冇咗呢回事。張有興叫樹根如果見到CY，一定要提佢兌現競選承諾，先至可以民望大翻身喎。至於點解樹根可以聚集咁多位前市政局議員，佢話多年前同其他卸任市政局嘅同事成立咗個組織，幾乎每個月都會出來聚一聚，食飯之餘仲會月旦政事添！
