劇毒皮蛋殺到 把關咪靠吹水

內地傳媒踢爆，江西南昌縣無良生產商為咗縮短醃製時間，用工業硫酸銅代替傳統石灰及食用鹼等原料醃製皮蛋。硫酸銅含有鉛、砷、鎘等重金屬，長期食用除咗會引發嚴重腎衰竭，導致智商下降變「低B」，嚴重者更會致癌添，問你驚未！

眾所周知，南昌縣係全國主要皮蛋產地，估計每月有幾千萬隻毒皮蛋銷往全國各地，本港亦有江西皮蛋出售，即係話，硫酸銅毒皮蛋好可能已經流入本港，市民中咗招都唔知。

食物安全又響警鐘，港產官僚仲滋油淡定，你急佢唔急。食物及衞生局局長高永文大派定心丸，話內地供港禽蛋由註冊養殖場及生產場提供，經過當地檢疫部門檢測，有安全證明；又話本港食安中心最近幾個月抽檢咗三十隻皮蛋，包括重金屬含量在內嘅測試，全部滿意喎。

嗱，嘢唔可以亂食，說話更加唔可以亂講。試諗吓，內地黑心食品醜聞有邊單唔係傳媒揭發或者消費者中咗招至曝光ｏ架？好似今次咁，如果唔係傳媒明察暗訪，毒皮蛋咪照樣當「安全食品」賣通街。如果檢疫部門信得過，內地同胞就唔使以食為憂，本港就唔會周不時出現毒菜毒魚毒蛋喇！

再講，就算內地檢測冇事，本港抽查過關，亦唔等於市面嘅皮蛋絕對安全。近年中港兩地水貨活動頻繁，出現漏網之「蛋」一啲都唔出奇。當局唔諗吓有乜應對措施防範未然，反而拍晒心口話冇事，萬一毒皮蛋流入本港，呢隻鑊邊個孭先！

其實，黑心食品層出不窮，港產官僚不嬲都係後知後覺，從孔雀石綠魚到蘇丹紅禽蛋，從三聚氰胺奶粉到致癌食油，從毒菜到含銅糉葉，餐餐都係傳媒踢爆至做嘢。最離譜係，當年蘇丹紅禽蛋流入本港，時任衞福局局長周一嶽仲大大聲否認，卒之要認衰道歉，醜態百出。

太一叮都係嗰句，政府靠得住，豬乸會上樹。黑心食品沒有最恐怖，只有更恐怖，呢次係毒皮蛋，下次又唔知輪到乜嘢。國產官僚信唔過，港產官僚亦靠唔住，市民惟有自求多福咯，叮！