Sun奇古怪：Sun潮語：無限Loop
近日網上瘋傳一條由CCTVB製作嘅兒歌MV，歌名叫做《請你食麵》。呢個MV之所以瘋傳係因為首歌夠騎呢。呢首歌嘅歌詞頭段不斷重複「麵麵麵麵麵，請你食個麵！」，加埋兩位歌手好落力咁Chok可愛，結合一啲唔知想點嘅舞步，相當重口味！網民有見及此，即刻將呢隻歌推己及人，仲喺個標題上形容呢隻歌係「天籟之音」，講到此曲只應天上有，務求令人Click落去聽，令更多人中伏！聽完之後，首歌嗰幾句「麵麵麵麵麵……」就會喺你腦海「無限Loop」，真係非常洗腦，唔信可以自己搵嚟聽吓，後果自負！
當一啲嘢不斷循環再循環，就可以叫做「無限Loop」。循環嘅嘢可以係一句說話，亦可以係某啲事情。當然循環同癌症一樣有惡性同良性，不過潮語「無限Loop」多數都係形容一啲唔係太好嘅事。
網上好多惡搞短片，都係將啲好難頂嘅嘢不斷重複剪輯，令到嗰幾句好惡頂嘅嘢「無限Loop」，經典例子係幾年前嘅「尖尖尖」牙刷廣告，有網友整咗個「無限Loop」版本，將嗰幾句「尖尖尖」Loop咗10分鐘！有網民將一啲歌某幾句「無限Loop」，呢個亦都係網上潮流之一。有啲官不斷打官腔嘅回應，無論問佢乜都係一樣嘅官樣答案，都係「無限Loop」嘅一種。
「無限Loop」呢句嘢其實係嚟自電腦系統，因為電腦運作有所謂「Infinity Loop」，就係指電腦系統運作出現嘅一啲問題，令到有啲程式不斷自動循環運作停唔到，從而癱瘓系統導致Hang機。所以喺現實生活，一啲人或事出咗問題，感覺就好似電腦程式錯誤咁「無限Loop」。例如最近有人被外國傳媒專訪，就出現咗多次同一答案「無限Loop」，完全答非所問，真係西人都無佢符！
