食物及衞生局局長高永文同政制及內地事務局副局長劉江華尋日入咗坪洲，出席新界社團聯會會長兼立法會議員梁志祥喺坪洲開設首個離島辦事處嘅典禮，典禮結束後，梁志祥捉咗高永文去巡區，要求當局批准區議會喺坪洲診所旁興建升降機，不過呢一行亦帶挈高永文喺街市買到心頭好。
身為潮州人嘅高永文好識食，尋日用咗近四百元分別買一條鹹魚同一抽鰵魚春，高醫生一見到啲鰵魚春就好似流晒口水咁，但魚春唔係好高膽固醇咩？高醫生話，煎香啲魚春好好味o架，唔係成日食都冇問題嘅。
