政壇：TVB新聞驚現簡體字字幕
九七回歸之後，本港嘅交通工具除咗會用廣東話同英語廣播外，亦會用埋普通話，部分公眾場所嘅標語除咗有繁體字外，亦有簡體字說明。點知被揶揄為「CCTVB」嘅無綫電視（TVB）尋晚六點半新聞，亦出現簡體字字幕，TVB「棄繁從簡」唔知係為咗進一步加強中港融合，定係為轉攻內地市場呢？
尋晚六點半新聞報道由新聞小花周嘉儀做主播，但令觀眾眼前一亮嘅就唔係呢朵小花，而係喺螢幕下方嘅簡體字字幕。事關當周嘉儀正報道有關美國中情局前特工斯諾登嘅新聞時，竟然出現簡體字字幕。不過，大約持續咗幾分鐘，字幕就一度暫停顯示，之後就轉番繁體字，相信係工作人員知道「出事」，急急補鑊。
不過，有關新聞片段出咗街後，就好似潑咗出去嘅水一樣，係收唔番嘅。有見證呢一個「歷史時刻」嘅網民，就喺網上討論區話被呢一幕嚇咗一跳，驚到食唔安坐唔落。
