政壇：吳得掂唔熟行令人不安
設計圖片及對白
新一屆政府快將上任一年，高官尤其係問責局長有幾多料亦現晒形，教育局局長吳克儉上任之後得咗個「吳得掂」嘅花名，聖士提反女校轉直資一事，社會討論多多，好多人關注呢個學界趨勢會否剝削窮學生入讀好學校嘅權利，吳得掂死撐唔會，但回應就漏洞多多，中文大學香港教育研究所客座教授曾榮光，尋日就借一個電台節目逐點反駁，仲唔客氣指出吳得掂有關直資問題嘅認識同理解水平令人訝異和不安。自吳出掌教育以嚟，唔少學子同家長受害不淺、雞飛狗走，吳得掂似乎應該叫反面教育局長就真。
設計圖片及對白
曾榮光喺節目中以致函吳得掂嘅形式，指出香港目前面對嘅直資學校問題，既糾正吳得掂對直資學校嘅數據唔正確，又間接踢爆吳得掂唔熟書、連自己局嘅網上資料都冇刨吓嘅現實。譬如吳得掂話直資學校中學費最貴嘅係一年十幾萬元，但曾榮光引教育局有關2013-2014年學費嘅網上資料澄清，最貴嘅學費只係每年八萬多元啫。
平均三萬學費 講成五千
搞錯學費外，吳得掂最大嘅問題仲係對直資問題嘅理解欠精確，回應直資學校嘅學費時，佢混淆、籠統咁話，依家有多過三成嘅直資學校每年學費少於五千元。曾榮光指出，呢個說法冇釐清直資學校嘅沿革同歷史因素，如果以二○○二年後轉直資嘅十二所學校，平均學費係每年三萬元，而唔係五千元囉。吳得掂嘅說法明顯係將九七年、甚至上世紀七十年代因好多歷史原因轉直資嘅學校一齊計，令傳統津貼學校轉為直資學校後、學費高昂的問題人為「平均化」。
曾榮光批評，吳得掂不加識別就把各種轉直資嘅學校當作一個整體去理解，這正是公共政策上嘅大忌，結果只會令港府制訂嘅相關政策流於掛一漏萬……吳得掂領導嘅教育局真係要好好反省吓有關政策及決定，千祈唔好搞壞咗香港百年樹人嘅大計。
