SUN世代：獨愛寶麗來
別人冷嘲熱諷，撲不熄廖紹冠的一團火。一年前他孤注一擲，拿出私藏的二百部寶麗來即影即有菲林相機開舖。數碼相機橫空出世後，菲林已打入冷宮，人人笑他發夢。「未試過點知唔得？」他咬實牙關，正好遇上內地吹起的寶麗來熱潮，小店擴張成大舖，證明無事不可能。
廖紹冠無視別人的冷嘲熱諷，努力實踐創業夢。
「巨型版」彩虹機是鎮店之寶。
灣仔皇后大道東有間樓上舖，並不起眼，抬頭望上去，隱約看到幾部寶麗來相機，才知是賣即影即有相機的店舖，「最初同人講開舖呢個諗法，個個都話一定衰硬，叫我預咗倒錢落海。唔試過又點知呢？就算真係失敗咗，都可以再嚟過。」
寶麗來，與廖紹冠有種莫名緣分。初中時期，他看到一套由日本影星木村拓哉飾演速遞員的日劇。劇中，木村每次送件都會用寶麗來為收件者拍照留念。「佢拎住部機好有型。」廖紹冠就買下他人生第一部寶麗來相機，之後像着了魔般，「見到啱又會買。」
那時，收藏寶麗來是個人興趣，他最想做廚師。「讀書成績一向平平，諗住出嚟做廚，就報咗廚藝學校，點知讀落先知自己都唔係好鍾意，於是轉咗讀酒店，再做Bell Boy。」
做了半年，又自覺英文水平未達標，向家人提出到瑞士進修英語，學習之旅又與寶麗來結緣。「嗰邊有好多跳蚤市場，有次放假去行，發現好多二手寶麗來相機，價錢仲好平，喺香港要千二蚊港紙嘅機，當地只需百二蚊港紙。」
在瑞士讀書三年，他差不多每星期都去逛跳蚤市場，搜羅逾四、五十部寶麗來相機。後來，拍賣網站興起，成為他入貨「儲機」另一途徑，「最高峰時儲咗二百部機。」詎料回港後，這二百部相機竟成為他的創業商機。
學成歸來，「諗過開糖水舖、咖啡店，但飲食業成本始終好貴……」他才記起自己擁有約二百部寶麗來相機，將個人興趣變成事業，應該不錯吧。就這樣，他決定開一間寶麗來相機專門店。
創業夢未圓已諸多阻滯，「搵舖都搵咗八、九個月，之後裝修又出咗問題，要畀錢搵過第二間整。」開舖第一個月，收入僅夠交租，人工當然蝕掉，他繼續堅持，先給他遇上伯樂—擁有最多寶麗來相機的世界紀錄保持者黃定敏（TM），「佢畀咗好多意見我，例如借啲絕版相機畀我喺間舖做展覽，同埋邊啲寶麗來相機有市場，又介紹啲行家我識，令愈嚟愈多人認識我間舖。」
生意漸上軌道，他就積極開拓內地市場，在微博上做宣傳，「近幾年內地興番即影即有，依家有近八成都係內地人生意，有啲仲喺台灣特登飛過嚟買機。」
為擴充業務，他在同區物色另一舖位，將於本月中搬舖，並打算加入咖啡店的元素。回想起一年前，他不禁感嘆：「諗番最初個個都唔睇好，好彩自己有堅持落去做，先可以有今日。」
廖紹冠小檔案
現職：Polab創辦人
學歷：瑞士 University Centre César Ritz酒店及旅遊管理學士
婚姻：未婚
