政壇：搞搞政：7．1千舖大酬賓 李鋈麟搶遊行客
設計圖片
每年七月一日香港都好熱鬧，今年再加上學者提出嘅「佔領中環」行動不斷發酵，有泛民主派又計劃當日做「佔中」預演。另一方面建制派又搞抗衡式「遍地開花」嘅嘉年華會。全港各區工商聯會長李鋈麟都有新招，佢正牽頭多個商舖食肆半價大酬賓，優惠限七．一當日下午二時至五時，擺明同七一遊行搶客正面對撼。據聞，已答允參加嘅商舖有一千多間，包括大型連鎖化妝品公司、時裝品牌，甚至大型連鎖快餐店，佢哋目標係一萬間商舖，實際折扣就由半價至八折不等，希望有一百萬人受惠喎。
設計圖片
李鋈麟尋日出席午餐會後爆料，話行動係要益街坊，但時間巧合撞正遊行嘅黃金時段噃。有人對呢招搶遊行客嘅成效存疑，話參加者可以先買平嘢後遊行啫。亦有疑慮認為，呢次大酬賓無講明港人優先，換言之港人同旅客都可受惠，原意係想做到皆大歡喜。不過，中港矛盾不斷深化，內地同港人會否為爭買平嘢而激化矛盾，李鋈麟又有冇多加留意同提防呢？
講到尾，呢個七一大酬賓計劃都好多問題未清晰，依家已經六月初，大酬賓嘅訊息仲係矇查查，令人對效果好存疑。
