政壇：李慧琼需打通18區經脈
李慧琼將會接掌黨內支部主席會議。
去年九月立法會選舉，民建聯由劉江華同李慧琼（Starry）出戰爭取喺五個超級區議會議席爭奪兩席，點知劉江華「甩轆」，衰咗一席，建仔都好傷，痛定思痛下惟有諗計補鑊，最近建仔就搵咗Starry接掌黨內支部主席會議，佢將會負責打通十八區經脈，同支部建立更緊密合作關係，不過建仔變陣可唔可以成功執漏，仲要慢慢觀察。
李慧琼將會接掌黨內支部主席會議。
建仔一向有個支部主席會議由秘書長負責主持，定期同各支部開會「收風」，今次「升呢」搵擔任黨副主席嘅Starry做主持，明顯係強化全港黨務統籌嘅一個安排，建仔中人形容，呢個安排有一定戰略意義，因為依家由Starry直接接掌支部主席會議，一來地區問題可以下情上達，二來佢本人亦可以緊貼區情「收風」，呢個絕對係雙贏局面。
不過，經歷上次立法會選舉後，建仔都小心翼翼，皆因喺政壇打滾過二十載嘅劉江華都會出局，點到其他人唔心驚膽戰？
