政壇：議員麥富寧「啃」900個月餅
麥富寧涉嫌多訂嘅九百個月餅成為證物，存放喺辦事處大半年，最近先至丟棄。（受訪者提供）
過時過節，常見啲區議員搞應節活動甚至蛇齋餅糉，觀塘區議員麥富寧更因為咁搞出官司。我哋早前收到投訴，話觀塘有位姓麥嘅議員訂多咗月餅就賴帳唔找數，了解下先知，涉事嘅姓譚男子自稱做義工，話去年中秋節前夕幫議員麥富寧向朋友訂咗一千個月餅，但事後麥富寧唔認帳，話只訂咗一百個，每個售價都要十元，一怒之下告上法庭，上月底終於庭外和解，麥富寧就賠償咗三千七百元了事。
麥富寧涉嫌多訂嘅九百個月餅成為證物，存放喺辦事處大半年，最近先至丟棄。（受訪者提供）
麥富寧回應事件話好無奈，亦好谷氣，簡直就係食咗死貓。件事令到九百個月餅成為證物，要放喺佢嘅議員辦事處大半年，直到最近先至可以丟棄。麥富寧話，嗰位姓譚男子係位七十多歲嘅老人家，可能一時聽錯佢講嘅嘢，為咗解決件事，佢惟有忍痛同法官及原告討價還價後，畀咗三千七百元化解件事，以後會小心處理呢啲事。不過，麥富寧質疑，喺官司期間，呢位老人家周圍污衊佢，所以會保留呢個追究權利喎。
