政壇：王國興得罪政府合約工
設計圖片及對白
公務員隊伍向來有編制及非編制僱員之分，非編制僱員如非公務員合約僱員、外判服務商僱員等近年已引發好多問題，工聯會尋日發表咗個報告，揭露政府合約工嘅問題，佢哋本嚟係想藉此呼籲政府多以長期合約聘請，減少剝削現象，但王國興發言時卻疑似講錯嘢，佢話：「佢哋（合約工）冇歸屬感、冇心機，懷疑政府近年機密文件外洩同呢個有啲關係！」咁講，係咪指摘合約工人、臨時僱員先係近年政府屢爆洩密事件嘅黑手呢？
設計圖片及對白
政府機密不時外洩，有時係政府官員有心放風試水溫，有時係議會大嘴巴。尋日工聯會嘅調查就話香港郵政聘用最多非公務員合約僱員，有逾二千人，佔該部門總員工人數高達三成，聘用外判工最多的則為食環署及康文署，分別聘用逾萬人，多個部門更出現外判工多於公務員的現象。佢哋批評政府以非公務員及外判方式請人壓低工資，令有關僱員變成「五無」人士，即「無年資、無晉升機會、無保障、無飯鐘錢、無士氣」。
僱員加班冇補水
工聯會嘅立法會議員郭偉強怒斥，政府成日要求呢啲僱員加班，但又冇補水；另一議員鄧家彪亦鬧政府請呢類僱員時有瞞數手法。王國興都不甘後人，提及合約工人對政府冇歸屬感，亦容易令政府嘅機密外洩，佢本來係要批評政府自作自受，害人害己，但由此路入，亦同時指摘合約工人係大嘴巴、爆料者啫﹖
其實，工聯會呢個調查都好有心，向二十七個政府部門提出了書面質詢，仲發現大部分合約工喺政府做嘢嘅年期都超過五年，足見問題嚴重，但講嘢一味大聲嘅王國興就只係掛住聲討政府，冇發覺自己得罪人添，可見噏得就噏，真係要戒呀！
