政壇：政商定格：王利民想演「牙擦蘇」
王利民自稱「骨格離奇」，好難同冼國林過招。
康宏理財集團主席王利民早前入股第一信用，問佢有冇同第一信用主席冼國林傾吓合作模式，佢就好坦白咁話仲未同對方見面，連切磋功夫嘅機會都未有。乜原來佢都識打功夫o架咩？佢話自己「骨格離奇」，好難同冼國林打過喎！
王利民自稱「骨格離奇」，好難同冼國林過招。
講到合作，佢仲大爆冼國林會開拍新一輯《黃飛鴻》，希望有機會可以客串，做「牙擦蘇」都唔拘喎！嘩！「牙擦蘇」都算係第二男主角啦，當年除咗飾演黃師傅嘅關德興師傅膾炙人口之外，扮演「牙擦蘇」嘅西瓜刨都深入民心，佢要演活「牙擦蘇」呢個角色，絕對會係另一個自我挑戰啦！
佢一向鐘意挑戰自我，早排先去完北極跑馬拉松，佢話手腳都凍到僵，好似搽咗大量收縮水咁，仲示範一次畀記者睇，見佢臉容扭曲，手手腳腳都縮埋一齊，雖然係誇張咗啲，但記者絕對體會到當時凍到咩程度！
