政壇：孫德基買衫都要審計
孫德基拿起件運動衫嘅掛牌，用幾分鐘仔細閱讀功能介紹。
審計署署長David孫德基曾經係全球四大會計師行嘅高層，睇數肯定叻過人。大前日David趁食飯時間偷閒購物，但佢全程只拎起一件黑色短袖衫，仲用咗幾分鐘仔細閱讀功能介紹。件衫集齊多項新科技，聲稱可以防紫外光、保暖兼快乾，仲可以促進血液循環，從而提升運動表現。咁多功能，售價自然唔平，每件售價為八百一十元。佢幾經掙扎最後冇買到。
孫德基拿起件運動衫嘅掛牌，用幾分鐘仔細閱讀功能介紹。
記者上前同佢打招呼，佢笑稱件衫太貴，又唔知功能係咪真係咁勁，都係諗諗先喎。唔講唔知，佢好鍾意跑步，讀大學時已養成跑步習慣，保持至今已近四十年。
話時話，佢依家嘅月薪都有十幾萬元，普羅市民可能覺得件衫好貴，但係連佢都呻貴，唔通佢揭發政府大花筒弊病揭得多，依家連買件戰衣都要衡工量值、審計過關至得？
