政壇：泛民入真普聯欠交會費
泛民成日話中央遲遲拖數唔肯落實真普選，但原來泛民自己都「拖數」，講緊嘅就係傾緊一七年及二○年普選方案嘅真普選聯盟（真普聯）。事關真普聯喺成立之初，已決定要求每個加入嘅政團交五千至一萬元會費，至於實際交幾多就豐儉由人。
但真普聯成立至今已幾個月，有真普聯中人就透露，工黨、職工盟、社總、街工、社民連同泛民中最有錢嘅公共專業聯盟（公專聯）都未交會費。公專聯莫乃光就否認拖欠會費，話公專聯今個星期初已交會費，仲交成萬元。社總會長張國柱就呻會費有啲貴，但就話會盡快籌錢喎！
另外，真普聯尋日開會決定開始討論一六、二○年立法會選舉方案原則、去信黃毓民確認會員資格，以及決定搵人民力量同社民連分別設計宣傳單張同錄製宣傳短片。召集人鄭宇碩解釋，因為白鴿黨、公文袋同工黨已先後為真普聯提供秘書等人手，而公專聯又幫真普聯去公司註冊處註冊，剩番人力同社民連未有特別任務在身啫。
