政壇：葉劉翻舊帳喪鬧教育局
陳嘉琪被葉劉斥態度傲慢。（資料圖片）
教育局局長吳克儉去咗南韓外訪，留低副局長Kevin楊潤雄出席尋日立法會教育事務委員會會議，向議員講解新高中學制嘅檢討進度。本來大家都想睇吓AO（政務官）出身嘅Kevin可唔可以一洗局長「唔得掂」嘅污名，點知佢講唔夠幾句，議員葉劉淑儀就好似食咗火藥咁批評依家嘅教育制度千瘡百孔，又鬧佢唔係做教育事務出身，答問題「照稿讀」，只係局方嘅扯線公仔。
陳嘉琪被葉劉斥態度傲慢。（資料圖片）
葉劉鬧完一輪依然怒氣未消，繼而將矛頭轉向Kevin隔籬嘅副秘書長陳嘉琪。葉劉翻舊帳話，以前曾向陳嘉琪反映過依家學生嘅語文水平唔掂，叫局方諗諗計，點知當時陳嘉琪回應一句：「唔係個個好似你個女咁叻！」此話令葉劉一直記到依家，尋日仲喺會上忍唔住話，未見過有高官咁傲慢。陳嘉琪見勢色唔對，即時擰晒頭話唔係咁嘅意思，可惜葉劉都唔想再聽佢解釋。
